Қазанның 22 жұлдызында аудандық мәдениет Үйінде мемлекеттік мереке – Республика күніне арналған салтанатты шара өтті. Мереке тәуелсіздік жылдарындағы Тайынша ауданының әлеуметтік-экономикалық дамуы туралы арнайы дайындалған бейнероликпен ашылды.

    

Аудан әкімі Берік Әлжанов барша жұртшылықты мерекемен құттықтап, мереке құрметіне арналған Баяндама барысында күнтізбедегі Республика күні — мағыналы да мазмұнды, тарихы терең, келешегі кемелді, айтулы мереке екенін ерекше атап өтті.

 

Марапаттау рәсімін өткізген Берік Ақылжанұлы тайыншалық бірқатар азаматты марапаттады. Солтүстік Қазақстан облысының полиция департаментінің басқарма бастығы Алексей Дементьев баршаны Республика күнімен құттықтап, Тайынша полициясы қызметкерлеріне жоғары марапаттар табыс етті. Медальдар, грамоталар, алғыс хаттар – міндеттерін адал және мінсіз атқарған бірқатар полиция қызметкерлеріне табысталды.  Марапатталғандардың қатарында полиция қызметкерлерінің анасы -  Қадиша Тюлегунова да болды. Баласы полицияның аға лейтенанты  Бауыржан Бақытжанұлы Серік Тайынша аудандық полиция бөлімінде қызмет атқарады. Қылмыспен күресте және құқықтық тәртіпті қамтамасыз етуде қызметтік міндеттерін абыроймен атқарып жүрген баласын  лайықты тәрбиелегені үшін полиция департаментінің басқарма бастығы А.Дементьев шынайы ризашылық білдіріп, Республика күніне орай СҚО ПД бастығының бұйрығымен Алғыс хат табыс етті.                                 

 

Қорғаныс істері бөлімінің басшысы Әділ Мұхамбетов жалпы білім беретін мектептер мен Агробизнес колледжінің үздік алғашқы әскери дайындық пәні мұғалімдеріне «Қазақстан Республикасының қарулы күштеріне 30 жыл» медальдарын табыс етті. Сондай-ақ салтанатты жағдайда жаңадан қабылданған мемлекеттік қызметшілер жауапты қызметті лайықты атқаруға ант берді,  олардың қатарында Амандық ауылдық округінің жаңа әкімі Нариман Қорқытбайұлы Тасымов болды.

 

Облыстық филармония өнерпаздарының көпшілік қауымға ұсынған концерттік бағдарламасы мерекелік кешке жиналғандарға көтеріңкі көңіл сыйлады. Еліміздің туы асқақтап, келешегі көркейе берсін. Мереке құтты болсын!

 

Гүл ЖАМАШҚЫЗЫ