Облыстық маңызы бар Келлер-Чкалово автожолының бойында “Адал” дәмханасы жолаушыларға өз есігін айқара ашты. Кәсіпкер Зауре Тұрлыбаева басшылық ететін дәмхана ғимаратында сонымен бірге азық-түлік және тұрмыстық тауарлар дүкені бар. Кәсібін дөңгелетіп, одан әрі кеңейтуді мақсат еткен Зәуре Әлішерқызының айтуынша, келушілердің басым бөлігі жүргізушілер мен жолаушылар. 

 

Үй тағамдарынан басқа, мәзірге туралған ет, ұйғыр лагманы, палау сияқты тағамдар енгізілген. Тамақтану орны барлық қажеттіліктермен жабдықталған және санитарлық талаптарға сәйкес келеді. Бүгінгі таңда кәсіпорында бес адам жұмыс істейді. Айта кетерлігі, З. Тұрлыбаева "Атамекен" Ұлттық кәсіпкерлер палатасы әзірлеген "Бизнестің жол картасы - 2025" бизнесті қолдау мен дамытудың мемлекеттік бағдарламасына қатысушы. Ол үшін кәсіпкер СҚО Кәсіпкерлер Палатасының Тайынша аудандық филиалына жүгініп, жеңілдетілген несиені рәсімдеген. Бағдарламаның көздеген негізгі мақсаты — өңірлік кәсіпкерлікті дамытуды және жұмыс істеп тұрған жұмыс орындарын қолдау, жаңа тұрақты жұмыс орындарын құру болып табылады.

 

Осыдан бір жарым жыл бұрын есігін айқара ашқан "Адал" дүкеніне де келушілердің қатары қалың. Дүкен сөрелерінде сүт, қаймақ, сары май, қымыз, жұмыртқа, коспа, құрт өнімдерін табуға болады. Дәмхананы алдағы уақытта ет өнімдерімен ауданға танымал кәсіпкер М. Бакиров қамтамасыз етеді деп күтілуде. 

 

Ашылу салтанатына жиналған қонақтардың қатары қалың болды. СҚО Кәсіпкерлер Палатасы Тайынша аудандық филиалының директоры А. Нұрахмет, Тайынша ауданы әкімдігінің кәсіпкерлік бөлімінің басшысы Н.В. Голубь, аудандық мәслихат депутаты А. Абдрахманова жаңа жұмыс орнының алдағы күндеріне сәттілік тіледі. Бұл күні дүкен төңірегінде орналасқан үйлердің балаларына балмұздақ таратылып, арнайы аниматорлар шақырылды. Сонымен бірге, халыққа тегін палау үлестірілді.

 

Негізгі мамандығы бойынша есепші Зауре Тұрлыбаева әлемдік үрдістерді үнемі бақылауда ұстайтынын жасырмайды. Содан болар, дүкен мен дәмхананың инфрақұрылымы да заманауи талаптарға сай. 

 

Іске сәт!

✍🏻Гүл ЖАМАШҚЫЗЫ